By Oddamavadi News

கிழக்கின் சிறுபான்மை ஆட்சி ! நனவாகிய கனவு நீடிக்குமா ? முதலமைச்சரும் ஆள்பவரும் யார் என்பதில் இழுபறி !

Posted in

என்னதான் கூறினாலும் ஸ்ரீலங்கா முஸ்லிம் காங்கிரசுக்கு உள்ளுர ஒரு பெருமைதான். தாங்கள்தான் ஆட்சியமைப்பதில் ஜாம்பவான்கள் என்பதில்தான் இத்தனை பெருமை. ஆனால் பாவப்பட்டவர்களாக வாக்களித்த மக்கள் வாயைப்பிளந்து கொண்டு என்ன நடக்கப்போகிறது என்று ஆளையாள் மாறி மாறிக் கேள்வி கேட்டுக் கொண்டிருக்கின்றார்கள்.

தாங்கள் தான் ஜாம்பவான்கள் என்று கூறியவர்கள் இன்னமும் அந்த மாகாணசபையின் ஆட்சி பற்றி உறுதியான தீர்மானமான முடிவு எதனையும் எடுக்க முடியாது தடுமாறிக் கொண்டிருக்கின்றார்கள். இத்தகைய ஒரு நிலைமைக்கு அவர்கள் சமூகத்தைப்பற்றி ஆளமாகச் சிந்திப்பதுதான் காரணம் என்று எமது வாசகர்கள் அவசரப்பட்டு முடிவெடுத்து விடக்கூடாது. ஸ்ரீலங்கா முஸ்லிம் காங்கிரஸ் அது அரசோடு கொண்டுள்ள உறவுகள், பட்டம் பதவி, அந்தஸ்து மற்றும் இன்னபிற சலுகைகள் என்பன போன்ற விடயங்களில் மிகக் கவனமாகக் காய் நகர்த்தி இருப்பதையும் இழந்து விடாமல் இன்னும் கூடுதலாக அடைந்து கொள்ள வேண்டியிருக்கின்றது.

இந்த சந்தர்ப்பத்தை இறுக்கிப்பிடித்துக் கொண்டு மத்திய அரசிலும் கொழுத்த அமைச்சுப் பதவிகளைப் பெற வேண்டும் அதேவேளை கிழக்கு மாகாணசபையையும் தமது பிடிக்குள் வைத்துக் கொள்ள வேண்டும் என்பதுதான் ஸ்ரீலங்கா முஸ்லிம் காங்கிரஸின் அறுதியும் இறுதியுமான நிலைப்பாடு.

இதன் காரணமாக வியூகம் அமைப்பின் ஒரு கட்டமாகவே தேர்தலுக்கு முன்னரே முன்னாள் கூட்டுறவுத் துறைப்பிரதியமைச்சரான பஷீர் சேகுதாவூத் தடாலடியாக தனது அமைச்சுப் பதவியை ராஜினாமாச் செய்தார். இப்பொழுது அவரும் ஹக்;கீமும் கொழுத்த முழு அமைச்சுப் பதவிக்கு நிபந்தனை விதித்து அரசோடு பேரம் பேசுகின்றார்கள்.

இதேவேளை இந்த சந்தர்ப்பத்தைப் பயன்படுத்தி தமது முஷ்டியை உயர்த்திக் கொள்ள தமிழ்த் தேசியக் கூட்டமைப்பும் தவம் கிடக்கிறது. தேசிய அரசு ஒன்றை அமைப்பதற்கு அரசு அழைத்தால் அதுபற்றிப் பரிசீலிக்கத் தயார் என்று தமிழ்த் தேசியக் கூட்டமைப்பின் தலைவர் இரா சம்பந்தன் சனியன்று கூறினார். ஆனால், மறுநாளோ முஸ்லிம் காங்கிரசுக்காக பரிந்து பேசுகிறார்.

முஸ்லிம் காங்கிரஸ் நாகரிகமில்லாமல் நடந்து கொண்டு தங்களுடனான சந்திப்பைத் தட்டிக்கழித்து விட்டது என்று பாராளுமன்ற உறுப்;பினர் சுரேஷ் பிரேமச்சந்திரன் அவர்கள் முன்னதாகக் கூறியிருந்தார். வெள்ளிக்கிழமை இரவு தங்களைச் சந்திக்க வருவதாகக் கூறிய ஸ்ரீலங்கா முஸ்லிம் காங்கிரஸ் கட்சியினர் தங்களை வந்து சந்திக்காதது ஒரு புறமிருக்க காத்திருக்க வைத்து விட்டு தொலைபேசிகளையும் நிறுத்தி வைத்து விட்டு அநாகரிகமாக நடந்து கொண்டார்கள் என்று அவர் ஊடகங்களுக்கு சொல்லியிருந்தார்.

இதேவேளை அதற்கடுத்த நாள் கடந்த ஞாயிறன்று இரா சம்பந்தனுக்கும் றவூப் ஹக்கீம் தலைமையிலான முஸ்லிம் காங்கிரஸ் உயர் மட்ட உறுப்பினர்களுக்குமிடையில் சந்திப்பொன்று இடம்பெற்றது.

இச் சந்திப்புப் பற்றி கருத்துத் தெரிவித்த தமிழ்த் தேசியக் கூட்டமைப்பின் தலைவர் இரா சம்பந்தன் ‘கிழக்கு மாகாணத்தில் ஆட்சியமைக்க முடியாத நிலைமை தொடர்வது உண்மை. தேர்தல் சுதந்திரமாக நேர்மையாக நடந்திருந்தால் நாங்கள் இன்னும் அதிகளவான ஆசனங்களைப் பெற்றிருக்கலாம். தெரிவு செய்யப்பட்ட மற்றத் தமிழ் உறுப்பினரான முன்னைநாள் முதலமைச்சர் சந்திரகாந்தன் அவர் தெரிவு செய்யப்பட்ட விதம் குறித்தும் பல கேள்விகள் எழுப்பப் படுகின்றன. அவர் வெற்றி பெற்றிருக்க முடியாது என்பதுதான் பொதுவான கருத்து. தமிழ் மக்கள் மிகவும் கூடுதலாக தமிழ்த் தேசியக் கூட்டமைப்பை ஆதரித்தார்கள். முஸ்லிம் மக்கள் கூடுதலாக ஸ்ரீலங்கா முஸ்லிம் காங்கிரஸை ஆதரித்தார்கள்.

எங்களுடைய தேர்தல் பிரசாரத்தின் அடிப்படையில் இந்த இரண்டு கட்சிகளும் ஆளுங்கட்சியை எதிர்த்தன. மக்கள் வழங்கியிருக்கின்ற ஆணையின் அடிப்படையில் தமிழ்த் தேசியக் கூட்டமைப்பும் ஸ்ரீலங்கா முஸ்லிம் காங்கிரசும் இணைந்து கிழக்கு மாகாணத்தின் ஆட்சியைப் பொறுப்பெடுக்க வேண்டும் என்ற அடிப்படையில்தான் தமது வாக்குகளை வழங்கியிருக்கின்றார்கள். அதுதான் மக்களுடைய தெளிவான முடிவு தேர்தல் நடந்த பொழுது அவ்விதமான பிரச்சாரம்தான் இடம்பெற்றது. தேர்தல் முடிந்த பிறகு மக்கள் மிகவும் கூடுதலாக அவ்வாறுதான் எதிர்பார்த்தார்கள். அவ்விதமான ஆட்சிதான் ஏற்பட வேண்டுமென்ற கருத்தைப் பகிரங்கமாகக் கூறிவந்திருந்தார்கள்.

ஆனால், அரசாங்கம் ஸ்ரீலங்கா முஸ்லிம் காங்கிரஸின் ஆதரவைப் பெற்று ஆட்சியமைப்பதற்கு முயற்சியெடுத்து வந்திருக்கின்றது. எங்களுக்கும் ஸ்ரீலங்கா முஸ்லிம் காங்கிரஸிற்குமிடையில் தொடர்பு இருந்து வந்திருக்கின்றது. அதன் தலைவர் றவூப் ஹக்கீம், மற்றும் அதன் முக்கியஸ்தர்களும் அந்தக் கூட்டத்தில் பங்குபற்றியிருந்தார்கள். முழுமையாக நாங்கள் மக்களுடைய எதிர்பார்ப்புக்களைப்பற்றித் தெளிவாக விளக்கினோம்.

தாங்கள் அரசுடன் பேசிய போதிலும் கூட இற்றை வரையில் அத பற்றி இன்னமும் ஒரு முடிவெடுக்கவில்லை என்று எமக்குக் கூறினார்கள். அந்த அடிப்படையிலேயே எமது கருத்துக்களை மிகவும் கவனமான பரிசீலனைக்குத் தாங்கள் எடுப்பதாகவும் அதுபற்றிச் சிந்தித்து மீண்டும் எம்முடன் பேசுவதாக அவர்கள் எமக்குத் தெரிவித்தார்கள். எமது பரஸ்பரக் கலந்துரையாடல் மிகவும் திருப்திகரமானதாக அமைந்தது’ என்றார் சம்பந்தன்.

இன்னும் யாராயினும் ஆட்சி அமைக்கவில்லை என்பது மக்களுடைய கவலைதானே என்று சம்பந்தனிடம் கேட்கப்பட்டபோது ‘இது மக்களுடைய கவலைக்கு அப்பாற்பட்;ட விடயம்’ என்று சம்பந்தன் பதிலளித்தார். ‘எங்களுடைய அத்தனை முயற்சியையும் நாங்கள் மேற்கொள்கின்றோம். இந்த விடயத்தில் எல்லோரும் பொறுமையாக இருக்க வேண்டிய தேவை இருக்கின்றது. ஏனென்றால் நாம் இதுபற்றி இதற்கு முன்பும், தேர்தல் நடந்த பொழுதும், முடிவுகள் அறிவிக்கப்பட்ட பொழுதும் பத்திரிகையாளர் மாநாட்டிலும் இன்றும் பகிரங்கமாகவும் கூறிவருகின்றோம். உங்களால் சிபார்சு செய்யப்படுகின்ற ஒருவரை நாங்கள் முதலமைச்சராக நியமிக்கத் தயாராக இருக்கின்றோம். இது விடயமாக முஸ்லிம் சமூகம் எதுவிதமான சந்தேகங்களும் கொள்ள வேண்டிய அவசியமில்லை. மக்களுடைய விருப்பத்திற்கேற்ப நல்ல முடிவுகளை எடுக்குமாறும் நாம் முஸ்லிம் காங்கிரசிற்குச் சொல்லியிருக்கின்றோம்.’ என்றார் சம்பந்தன்.

‘நிச்சயமாக உங்களுக்கு வாக்களித்த முஸ்லிம் மக்கள் நீங்கள் எங்களுடன் சேர்ந்துதான் ஆட்சியமைக்க வேண்டுமென்று விரும்பி வாக்களித்தார்கள். அவ்விதமான பிரச்சாரம்தான் இடம்பெற்றது. எமது தமிழ் மக்களும் முஸ்லிம் முதலமைச்சரை ஏற்றுக் கொள்வதற்குத் தயாராய் இருக்கின்றார்கள். முஸ்லிம் காங்கிரஸ் காரர்களுக்கு சில பல பிரச்சினைகள் இருக்கலாம். அவற்றைப் பேசித் தீர்ப்பதற்கு நாங்கள் மிகவும் பொறுமையுடன் இருப்பது அவசியம். மக்கள் குழம்புவார்கள் என்பதற்காக நாங்கள் குழம்பிக் கொள்ள முடியாது. நாங்கள் பொறுப்புடன் பொறுமையாகச் செயற்பட வேண்டும்.