Posted in
அண்மைக் காலமாக கல்குடா முஸ்லிம் பிரதேசங்களைக் குறிவைத்து பிரமிட் முறையிலான வணிகம் மேற்கொள்ளும் ஒரு சில நிறுவனங்கள் தங்களது யுக்திகளைக் கையாண்டு அப்பாவிப் பொதுமக்களின் பணத்தைக் கொள்ளையிட்டுச் செல்லும் நடவடிக்கையில் ஈடுபட்டு வருகின்றனர். இது இஸ்லாத்தில் கூடுமா? இது சட்டக்காப்புக்குட்பட்டதா? உண்மையில் இதன் நோக்கம் என்ன என்பது பற்றி யோசிக்காமல் குறித்த நிறுவன ஏஜென்டுகளின் கவர்ச்சிப் பேச்சில் மதிமயங்கி தாங்கள் சேமித்து வைத்திருந்த பணத்தினை விரைவில் பல மடங்காக மாற்றலாம் என்ற கனவுடன் குறித்த நிறுவனம் வழங்கும் பெறுமதியற்ற பொருளை பெருந்தொகை கொடுத்து வாங்குவது மட்டுமல்லாது அந்த நிறுவனத்தின் தூண்டுதலால் மற்றையவர்களையும் இந்த வியாபாரத்திற்கு உள்நுழைக்க இந்த சதிவலையில் விழுந்த ஆண்கள், பெண்கள் எனப் பலரும் பாடுபடுகின்றனர். தான் சதிவலையில் விழுந்தது மட்டும் போதாது மற்றவர்களையும் வீழ்த்த வேண்டும் என்ற நோக்கமே இதன் அடிப்படையாகவும் காணப்படுகின்றது.
இந்த விடயம் அண்மைக் காலமாக சமூக சிந்தனை கொண்ட சில நண்பர்களினால் சமூக வலைத்தளங்களில் பேசுபொருளாக ஆக்கப்பட்டிருந்தது. அத்தோடு இன்னும் சில நண்பர்கள் அரசாங்கத்திற்கும் இது தொடர்பாக அறிவித்திருந்தனர்.
அந்தவகையில் கடந்த வெள்ளிக்கிழமை 16.02.2018ம் திகதி மீராவோடை தாருஸ்ஸலாம் ஜும்ஆப் பள்ளிவாயலில் ஏ.எல். பீர் முஹம்மத் (காஸிமி) அவர்களினால் நிகழ்த்தப்பட்ட குத்பாப் பிரசங்கமும் இந்த பிரமிட் வணிகம் சம்மந்தமான பல தெளிவான விடயங்களை பொதுமக்களுக்குக் கொடுத்திருந்தது. அத்தோடு எதிர்வரும் 22.02.2018ம் திகதி வியாழக்கிழமை இஷாத் தொழுகையின் பின்னர் “பிரமிட் வணிகம், இஸ்லாமியப் பார்வை” என்ற தொனிப் பொருளில் ஏ.எல். பீர் முஹம்மத் (காஸிமி) அவர்களினால் மீராவோடை தாருஸ்ஸலாம் ஜும்ஆப் பள்ளிவாயலில் உரை நிகழ்த்தப்படவுள்ளது.
சமூகம் சார்ந்த பாதிப்பைத் தடுக்க JDIKயினால் எடுக்கப்படும் இம்முயற்சிகள் மிகவும் வரவேற்கத்தக்கவை மற்றும் பாராட்டத்தக்கவை.
இவ்வாறானதொரு சமூகம் சார்ந்த பாதிப்பினை தடுப்பதற்கு அனைத்து இஸ்லாமிய இயக்கங்களும் ஒன்றிணைந்து செயற்பட வேண்டும். கற்ற சமூகம் இது தொடர்பில் அதிக கவனம் செலுத்தி தங்களது பங்களிப்பினையும் வழங்க வேண்டும். பாரியளவில் இது தொடர்பான விளக்க நடவடிக்கைகள் இடம்பெற வேண்டும். குத்பாப் பிரசங்கங்கள் இது தொடர்பில் நிகழ்த்தப்பட வேண்டும் என்பனவே சமூகம் சார்ந்த ஊடகம் என்ற வகையில் எமது பாரிய எதிரப்பார்ப்பாகவுமுள்ளது. இதற்காக எந்நேரமும் எமது ஊடகமும் பாரிய பங்களிப்பை வழங்கத் தயாராக உள்ளது என்பதனையும் தெரிவித்துக் கொள்கின்றோம்.-ஆதம் றிஸ்வின் -
© ODDAMAVADI NEWS
