Posted in
இலங்கை அகதி முகாம்களில் வசிக்கும் 30 மாணவ மாணவிகளின் உயர் கல்விச் செலவை நடிகர் கருணாஸ் ஏற்றுக் கொண்டுள்ளார் என தெரிவிக்கப்பட்டுள்ளது. இதுகுறித்து நடிகர் கருணாஸ் கூறியதாவது,
இலங்கையில் தமிழர் கல்வியில் புறக்கணிக்கப்பட்டதே பேரழிவுக்கு அடிப்படை காரணமாக அமைந்தது. தமிழ்நாட்டில் அகதி முகாம்களில் உள்ள தமிழர்கள் அரசு உதவியால் அன்றாட வாழ்வை மட்டுமே நகர்த்த முடியும். அங்கு அதிக மதிப்பெண்கள் பெற்ற திறமையான மாணவ மாணவிகள் பலர் உள்ளனர்.
அவர்களுக்கு உயர்கல்வியினை தொடர வாய்ப்பினைக் கொடுத்தால் நல்ல வருமானமுடைய வேலைக்கு செல்லக்கூடிய வாய்ப்பேற்படும். இதன் மூலம் அவர்களை சுற்றி இருப்பவர்கள் வாழ்க்கையில் முன்னேற்றம் ஏற்படும். அந்த சிந்தனையில் தான் 30 பேரின் உயர்கல்விச் செலவை ஏற்றுள்ளேன்.
உயர் கல்வி பெற்று வேலைக்கு செல்பவர்கள் அறக்கட்டளையை நிறுவி தங்கள் ஊதியத்தில் 10 சதவீதத்தை அதற்கு அளிக்க வேண்டும். அந்த தொகை மூலம் அகதி முகாம்களில் உள்ள மேலும் பல மாணவ மாணவிகளுக்கு உயர்கல்வி அளித்து வேலை வாய்ப்பை ஏற்படுத்தி கொடுக்க முடியும். இதன் மூலம் அகதி முகாம்களில் வசிக்கும் மக்கள், வாழ்வில் மறுமலர்ச்சி ஏற்படும்.
என்னைப் போல் பலர் கல்வி உதவி அளிக்க முன் வரவேண்டும் என்று விரும்புகிறேன். அகதி முகாம்களில் உள்ள ஊனமுற்றோருக்கு உணவு உள்ளிட்ட வசதிகளை அளிக்க குறிப்பிட்ட அளவு இடம் வேண்டும் என்று என்னிடம் கேட்டனர். அதற்காக ஒரு ஏக்கர் நிலத்தை வழங்கி உள்ளேன் என்றார்.
